கூட்டுறவு சங்கங்களில் பெற்ற பயிர்க்கடன்களை எவ்வித நிபந்தனையுமின்றி முழுமையாகத் தள்ளுபடி செய்ய வலியுறுத்தி, திருச்சி மாவட்டம் சமயபுரம் அருகே 500-க்கும் மேற்பட்ட விவசாயிகள் இன்று 4-வது நாளாகத் தொடர் காத்திருப்புப் போராட்டத்தில் ஈடுபட்டு வருகின்றனர்.
சட்டமன்ற தேர்தல் காலத்தில் அளிக்கப்பட்ட வாக்குறுதியின்படி, கூட்டுறவு சங்கங்களில் விவசாயிகள் வாங்கிய பயிர்க்கடன்களைத் தமிழக அரசு உடனடியாக முழுமையாகத் தள்ளுபடி செய்ய வேண்டும் என போராட்டக்காரர்கள் வலியுறுத்தி வருகின்றனர்.
இக்கோரிக்கையை வலியுறுத்தி 40-க்கும் மேற்பட்ட விவசாயச் சங்கங்களின் தலைவர்களும் நிர்வாகிகளும் ஒருங்கிணைந்து இப்போராட்டத்தில் பங்கேற்றுள்ளனர்.
சமயபுரம் அருகே பிரம்மாண்டமான கூடாரம் அமைத்துத் தொடர் போராட்டத்தில் ஈடுபட்டு வரும் விவசாயிகள், பயிர்க்கடன் தள்ளுபடி குறித்துப் பேச்சுவார்த்தை நடத்தத் தமிழக அரசு மறுப்பதாகக் குற்றம்சாட்டியுள்ளனர்.
அரசின் இப்போக்கைக் கண்டிக்கும் வகையில், விவசாயிகள் தங்கள் காதில் பூ வைத்துக்கொண்டு, விசில் ஊதி நூதன முறையில் தங்களது எதிர்ப்பைப் பதிவு செய்தனர்.
தமிழக அரசு உடனடியாகத் தலையிட்டு பேச்சுவார்த்தை நடத்தி, கடன்களை முழுமையாகத் தள்ளுபடி செய்ய நடவடிக்கை எடுக்க வேண்டும் எனப் போராட்டத்தில் ஈடுபட்டுள்ள விவசாயச் சங்கப் பிரதிநிதிகள் வலியுறுத்தினர்.
