நெல்லை மாவட்டம் காவல்கிணறு மகேந்திரகிரி இஸ்ரோ மையத்தில், எல்.வி.எம்.3 விண்கலத் திட்டத்திற்கான கிரையோஜெனிக் இன்ஜினின் விமான ஏற்பு சோதனை வெற்றிகரமாக நடைபெற்றது.
நெல்லை மாவட்டம் காவல்கிணறு மகேந்திரகிரி இஸ்ரோ மையத்தில் ராக்கெட் விண்ணில் செலுத்துவதற்கான தேவையான கிரையோஜெனிக் இன்ஜின் தயாரிக்கப்பட்டு வருகிறது. இதற்கான விமான ஏற்பு சோதனை தற்போது வெற்றிகரமாக நடத்தப்பட்டுள்ளது.
இதற்காக, பல்வேறு கட்ட சோதனைகள் மேற்கொள்ளப்பட்டு, வெற்றி இலக்குகளை அடைந்து வருவது குறிப்பிடத்தக்கது. குறிப்பாக, விண்வெளியில் மனிதர்களை அனுப்பும் ககன்யான் திட்டத்துக்காக உருவாக்கப்பட்ட ராக்கெட் கட்டமைப்புகளின் சோதனைகளும் மகேந்திரகிரி இஸ்ரோ மையத்தில் தொடர்ந்து நடைபெற்று வருகின்றன.
இந்த நிலையில், ராக்கெட்டில் மனிதர்களை அனுப்பும் வகையில் தயாரிக்கப்பட்ட ராக்கெட் எஞ்சினுக்கான சோதனை நடத்தப்பட்டுள்ளது. எல்.வி.எம்.3 ஏவுகணையின் மேல் நிலைக்கு பயன்படுத்தப்படும் சி.இ.20 இன்ஜினின் விமான ஏற்பு சோதனை நடைபெற்றதாக தெரிவிக்கப்பட்டுள்ளது.
இந்த சோதனை மூலம் இன்ஜினின் செயல்பாடு, அதன் திறன் மற்றும் விண்ணில் செலுத்தும் பணிக்கான தயார்நிலை ஆகியவை பரிசோதிக்கப்பட்டன. சோதனையின் போது இன்ஜின் திட்டமிட்டபடி செயல்பட்டு வெற்றி பெற்றதாக தெரிவிக்கப்பட்டுள்ளது.
பி.எஸ்.எல்.வி. உள்ளிட்ட ராக்கெட்டுகளின் செயல்பாட்டில் முக்கிய பங்கு வகிக்கும் மகேந்திரகிரி இஸ்ரோ மையத்தில், விண்வெளித் திட்டங்களுக்கான இன்ஜின்கள் மற்றும் உந்துவிசை அமைப்புகள் தொடர்பான முக்கியமான சோதனைகள் தொடர்ந்து நடைபெற்று வருகின்றன.
குறிப்பாக, ககன்யான் திட்டத்துக்கான மனிதர்களை ஏற்றிச் செல்லும் ராக்கெட்டின் தயாரிப்பு பணிகளில் இந்த சோதனை முக்கிய முன்னேற்றமாக பார்க்கப்படுகிறது.
கடந்த காலங்களில் எல்.வி.எம்.3 தொடர்பான சோதனைகள் பல வெற்றிகரமாக நடத்தப்பட்ட நிலையில், தற்போது நடைபெற்ற இந்த விமான ஏற்பு சோதனையும் வெற்றி பெற்றிருப்பது இஸ்ரோவின் அடுத்தகட்ட விண்வெளி முயற்சிகளுக்கு முக்கியத்துவம் வாய்ந்ததாக அமைந்துள்ளது.
