சிவகிரியில் விவசாயி உயிரிழப்பு: காவல் ஆய்வாளரை கைது செய்ய கோரிக்கை

தென்காசி , May 24 : நிலப் பிரச்சினை தொடர்பான போலீஸ் விசாரணைக்குப் பிறகு விவசாயி ஒருவர் காவல் நிலையம் அருகே விஷம் அருந்தி உயிரிழந்த சம்பவம், தென்காசி மாவட்டம் சிவகிரியில் பெரும் பதற்றத்தை ஏற்படுத்தியுள்ளது. சம்பந்தப்பட்ட காவல் ஆய்வாளரை உடனடியாகக் கைது செய்யக் கோரி, உயிரிழந்தவரின் உடலை வாங்க மறுத்து உறவினர்களும் பொதுமக்களும் சிவகிரி காவல் நிலையம் முன்பாக சாலை மறியல் போராட்டத்தில் ஈடுபட்டு வருகின்றனர்.

பிரச்சினையின் பின்னணி

தென்காசி மாவட்டம் சிவகிரி அருகே உள்ள தளவாய்புரம் கிராமத்தைச் சேர்ந்தவர் அந்தோணிராஜ் (63). விவசாயியான இவருக்கும், இவரது வீட்டின் அருகில் வசிக்கும் பேச்சிப்பாண்டி என்பவரது மனைவி பசுபதிக்கும் (37) இடையே நீண்ட நாட்களாக இடப் பிரச்சினை இருந்து வந்துள்ளது. இந்த விவகாரம் தொடர்பாக பசுபதி சிவகிரி காவல் நிலையத்தில் புகார் அளித்துள்ளார். இப்புகாரை விசாரித்த போலீஸார், பிரச்சினைக்குரிய இடத்தை நில அளவையர் (சர்வேயர்) மூலம் முறையாக அளந்து அதன்படி முடிவெடுக்குமாறும், அதன்பின்னரும் உடன்பாடு ஏற்படாவிட்டால் நீதிமன்றத்தை அணுகித் தீர்வு காணுமாறும் இரு தரப்பையும் அறிவுறுத்தி அனுப்பியுள்ளனர்.

மீண்டும் வெடித்த விவாதம்

இந்நிலையில், சர்ச்சைக்குரிய அந்த இடத்தில் அந்தோணிராஜ் தரப்பினர் கட்டுமானப் பணிகளை மேற்கொண்டு வருவதாக பசுபதி தரப்பில் மீண்டும் காவல் நிலையத்தில் புகார் அளிக்கப்பட்டது. இதனைத் தொடர்ந்து இரு தரப்பையும் மீண்டும் அழைத்து விசாரணை நடத்திய போலீஸார், நிலத்தை முறைப்படி அளவீடு செய்யும் வரை அங்கு எந்தவித கட்டுமானப் பணிகளையும் மேற்கொள்ளக் கூடாது என்று உத்தரவிட்டு அனுப்பியுள்ளனர்.

ஆனால், காவல் துறையின் இந்த அணுகுமுறை அந்தோணிராஜுக்கு கடும் மன உளைச்சலை ஏற்படுத்தியது. தன் மீது போலீஸார் ஒருதலைப்பட்சமாகப் பொய் வழக்கு போட முயற்சிப்பதாக அவர் அஞ்சியுள்ளார்.

காவல் நிலையம் அருகே விபரீதம்

கடந்த 21-ஆம் தேதி, கடும் விரக்தியடைந்த அந்தோணிராஜ் சிவகிரி காவல் நிலையம் அருகே திடீரென விஷம் அருந்தியுள்ளார். பின்னர் விஷம் பரவிய நிலையிலேயே காவல் நிலையத்திற்குள் சென்றுள்ளார். இதைக் கண்டு அதிர்ச்சியடைந்த போலீஸார், அவரை உடனடியாக மீட்டு சிவகிரி அரசு மருத்துவமனைக்கு அனுப்பி வைத்தனர்.

அங்கு முதலுதவி சிகிச்சைக்குப் பின், மேல் சிகிச்சைக்காக திருநெல்வேலி அரசு மருத்துவக் கல்லூரி மருத்துவமனைக்கு அவர் கொண்டு செல்லப்பட்டார். அங்குள்ள தீவிர சிகிச்சைப் பிரிவில் அனுமதிக்கப்பட்டு, மருத்துவர்களின் கண்காணிப்பில் இருந்து வந்த அந்தோணிராஜ், சிகிச்சை பலனின்றி இன்று பரிதாபமாக உயிரிழந்தார். இந்த மரணச் செய்தி தளவாய்புரம் கிராமத்தில் காட்டுத்தீயாகப் பரவியதைத் தொடர்ந்து அப்பகுதியில் சோகமும் பதற்றமும் தொற்றிக் கொண்டது.

விவசாயி உயிரிழந்ததை அடுத்து, ஆத்திரமடைந்த அவரது உறவினர்களும் தளவாய்புரம் கிராம மக்களும் திரண்டு வந்து சிவகிரி காவல் நிலையத்தின் முன்பாக பிரதான சாலையில் அமர்ந்து மறியல் போராட்டத்தில் ஈடுபட்டனர். சங்கரன்கோவில் மற்றும் கரிவலம்வந்தநல்லூர் உள்ளிட்ட முக்கியப் பகுதிகளுக்குச் செல்லக்கூடிய பிரதான சாலை இது என்பதால், இப்பகுதியில் போக்குவரத்து முற்றிலும் முடங்கியது. சாலையின் இருபுறமும் வாகனங்கள் நீண்ட தூரத்திற்கு அணிவகுத்து நின்றன.

பொதுமக்களின் திடீர் போராட்டத்தால் நிலைமை சட்டம் ஒழுங்கு பிரச்சினையாக மாறாமல் தடுக்க, மாவட்டக் காவல் கண்காணிப்பாளர் உத்தரவின் பேரில் நூற்றுக்கும் மேற்பட்ட போலீஸார் சிவகிரி காவல் நிலையப் பகுதியில் குவிக்கப்பட்டு, பலத்த பாதுகாப்புப் பணியில் ஈடுபடுத்தப்பட்டுள்ளனர்.

மகன் இசைக்கித்துரை பேட்டி

போராட்டக் களத்தில் இருந்த உயிரிழந்த விவசாயி அந்தோணிராஜின் மகன் இசைக்கித்துரை ஊடகவியலாளர்களிடம் பேசுகையில் தங்களது குடும்பத்தின் நிலையை வேதனையுடன் பகிர்ந்துகொண்டார்.

“என் தந்தையின் சாவுக்கு சிவகிரி காவல் ஆய்வாளர் முரளிதரன் தான் முழு முதற்காரணம். அவர் ஒருதலைப்பட்சமாகச் செயல்பட்டு என் தந்தையை மிரட்டி, பொய் வழக்கு போடுவதாக மன உளைச்சலுக்கு ஆளாக்கியுள்ளார். இந்த சம்பவத்திற்கு முக்கியக் குற்றவாளியான காவல் ஆய்வாளர் முரளிதரனைப் பணி இடைநீக்கம் செய்வதோடு நிறுத்தாமல், அவரை உடனடியாகக் கைது செய்ய வேண்டும். அதுவரை என் தந்தையின் உடலை நாங்கள் பெற்றுக்கொள்ள மாட்டோம்,” என்று அவர் உறுதியாகத் தெரிவித்தார்.

ஆய்வாளர் காத்திருப்போர் பட்டியலுக்கு மாற்றம்

இந்த விவகாரம் மாவட்ட அளவில் பெரும் விவாதத்தை ஏற்படுத்திய நிலையில், துறை ரீதியான முதற்கட்ட நடவடிக்கையாக சிவகிரி காவல் ஆய்வாளர் முரளிதரன் உடனடியாகக் காத்திருப்போர் பட்டியலுக்கு மாற்றப்பட்டுள்ளதாகக் காவல் துறை தரப்பில் அதிகாரப்பூர்வமற்ற தகவல் வெளியாகியுள்ளது.

இருப்பினும், தங்களது கோரிக்கையில் உறுதியாக இருக்கும் பொதுமக்கள் தொடர்ந்து போராட்டத்தில் ஈடுபட்டு வருவதால், சிவகிரி பகுதியில் தொடர்ந்து பதற்றமான சூழல் நிலவி வருகிறது. உயர்மட்டக் காவல் அதிகாரிகள் பொதுமக்களுடன் சமரசப் பேச்சுவார்த்தை நடத்தி வருகின்றனர்.